Print this page   Email this page

Cylch Meithrin

Mudiad Ysgolion Meithrin yw’r prif ddarparwr o ofal ac addysg blynyddoedd cynnar cyfrwng Cymraeg yn y sector gwirfoddol. I gyflawni hyn, mae'r mudiad yn sefydlu a chefnogi cylchoedd meithrin.

Nod y cylch meithrin yw hyrwyddo addysg a datblygiad plant o ddwy flwydd oed hyd at oed ysgol.  Mae cyfle i blant gymdeithasu a dysgu trwy chwarae dan arweiniad staff proffesiynol, cymwys a brwdfrydig.

* Mae dros 500 o gylchoedd meithrin yng Nghymru.
* Mae dros 18,000 o blant yn cael cyfle i ddysgu trwy
   chwarae yn y cylchoedd.
* Cymraeg yw iaith y cylch meithrin.
* Mae’r un croeso yn y cylch i blant di-Gymraeg ag
   sydd i blant Cymraeg eu hiaith.  
* Mae'r pwyslais ar ddatblygu sgiliau iaith Gymraeg pob
   plentyn. 

“Rydym fel teulu wrth ein boddau pan ddaw ein mab adref yn llawn storïau doniol ac yn canu caneuon newydd a ddysgodd yn y cylch.  Mae’r addysg gychwynnol a gaiff yno yn ardderchog ac yn ddechrau da i’w addysg gynradd.”  
Dyfyniad gan riant o gylch meithrin yng ngogledd Cymru

Mae chwarae yn sylfaenol i bob agwedd o ddatblygiad plant. Felly, mae’r profiadau a gweithgareddau'r darpariaethau wedi eu seilio ar ddysgu trwy chwarae. Mae pwyslais arbennig ar ddatblygiad iaith, datblygiad personol, cymdeithasol ac emosiynol plant yn y cylchoedd.

Mae ymchwil diweddar gan yr Athro Colin Baker ac Elen Lloyd Roberts o Brifysgol Bangor yn nodi pwysigrwydd cylchoedd meithrin Mudiad Ysgolion Meithrin i ddyfodol yr iaith Gymraeg:

‘Dangosodd yr ymchwil fod plant sy’n mynychu cylchoedd Mudiad Ysgolion Meithrin yn datblygu’n sylweddol dros ystod eang o sgiliau iaith Gymraeg.’
Yr Athro Colin Baker

Mae croeso i bob plentyn i'r cylchoedd waeth beth fo'i liw, hil, dosbarth cymdeithasol, sefyllfa teuluol neu anghenion addysgol. Mae cefnogaeth ychwanegol ar gael i blant ag anghenion ychwanegol i'w galluogi i ymuno yn holl weithgareddau'r cylch.

Gallwch ddod o hyd i gylch meithrin lleol trwy glicio ar Chwilio am Gylch

Taflen Gwybodaeth

Taflen Gwybodaeth (1697Kb)
 Lawrlwytho

Croeso i'r cylch meithrin (697Kb)
 Lawrlwytho